Aumingjastimpill
Aðvörun!!! þetta er enn eitt femínistabloggið
Hérna á eftir tæti ég niður grein Gunnars Smára Jafnréttið eftir jafnréttið sem birtist í
Fréttablaðinu bl.15 þann 27. júní og grein Signýjar Sigurðardóttur
Gerendur og þolendur sem birtist 30. júní 2003
Er þessi grein Signýjar grín?
Sem slík er hún ok. Ekkert sérstaklega fyndin samt.
Signý segir um Femínistafélagið:
"...þá hef ég orðið fyrir miklum vonbrigðum með árherslur þeirra. Það að leggja svo mikla áherslu á “aumingjahlutverkið”...". Signý segir um kvennasamtökin Sjálfstæðar konur:
"...því málflutningur þessara kynsystra minna allar götur síðan hefur miklu fremur verið í þá átt að vinna gegn jafnrétti en að stuðla að því..."
Signý mærir jafnréttisgreinar Gunnar Smára meira en góðu hófi gegnir, sérstakt lof ber hún á
"ábendingar til okkar kvenna um að líta í eigin barm". Oflof er last og greinaskrif Gunnars Smára verða nánast afkáraleg þegar kona sem kallar sig jafnréttissinna notar skrifin til að gera lítið úr margs konar jafnréttisbaráttu og fellur í þá gryfju að nota í orðræðu sinni ónefni og háðsorð sem andstæðingar þeirrar jafnréttisbaráttu hafa búið til. Hún talar um
"fórnarlambshlutverkið" og "
aumingjastimpil" og
"aumingjahlutverkið". Signý virðist líka telja að barátta fyrir jafnrétti á vinnumarkaði tengist ekki lítilsvirðingu kvenna á kynlífsmarkaði. Hún margendurtekur þetta í greininni: "
Ég held að hér séu tveir ólíkir hlutir á ferðinni sem ber mikla nauðsyn til að aðskilja...". Signý segir önnur atriði mikilvægari en baráttu gegn notkun kvenlíkamans í auglýsingum.
Í greininni Jafnréttið eftir jafnréttið fjallar Gunnar Smári um að þó að lögformlegu jafnrétti sé náð þá er hið raunverulega jafnrétti langt undan. Gunnar Smári segir að baráttuaðferðir og sjálfsmynd þriðju bylgju femínista verði að laga sig að þessu.
Hann segir að galdurinn við að berjast fyrir jafnrétti hljóti að felast í sjálfmyndinni frekar en kröfum um breytingar á samfélaginu. Það sé rétt fyrir femínista að beina kröfunum að sjálfum sér.
Þetta er alla vega mín túlkun á grein Gunnars Smára. Með öðrum orðum. Femínistar eiga að leggja minni áherslu á samfélagsbreytingar og reyna frekar að breyta sjálfsmynd sinni/sjálfsmynd kvenna.
Ég er sammála sumu í þessari grein Gunnars. Sérstaklega þeirri staðreynd að lögformlegt jafnrétti er mun lengra komið en raunverulegt jafnrétti. Og það þarf að breyta sjálfsmynd flestra kvenna. Það þarf reyndar ennþá frekar að breyta sjálfsmynd flestra karla.
En þetta með að beina kröfunum að sjálfum sér hljómar soldið einkennilega... náttúrulega miklu þægilegra fyrir þá sem vilja halda völdum ef ódælir undirokaðir hópar eyða öllu púðrinu í því að breyta sjálfum sér...
Ég held að það sé skynsamlegast að beina
kröftunum að sjálfum sér og
kröfunum út á við. Það hafa undirokaðir hópar alltaf gert - safnað kröftum og byggt upp samtakamátt og herjað svo á þá sem hafa völdin. Og það má líka stunda skæruhernað í dag á ímyndir og sjálfsmyndir.
Ég hef þetta að segja um málflutning Signýjar og Gunnars Smára:
Mér finnst bara hið besta mál að sem flestir velti fyrir sér femínisma og finni sjálfir sinn takt í jafnréttismálum. Það er allt í fína að Signý og Gunnar Smári séu ekki með sömu áherslur og ég. Minn sannleikur er ekki endilega sannleikur allra annarra og þó mér finnist mikilvægt að ímynd kvenna í máli og myndum sé ekki afmennskuð og að manneskjur eða líkamshlutar af manneskjum séu ekki söluvörur á markaði þá finnst kannski öðrum það hégómi einn. Ég vil hvetja þau bæði til að gera eitthvað í þeim málum sem þeim finnst brýn og reyna að breyta heiminum til að gera hann að betri stað fyrir alla, kannski alveg eins með að breyta sjálfum sér og sínu nánasta umhverfi. En ég vil líka hvetja þau til að gera ekki lítið úr baráttu annarra sem vinna að mannréttindamálum.
Ég vil vinna að mannréttindamálum og ég geri það núna innan Femínistafélagsins. Ég trúi á þann málstað sem ég vinn að og það veitir mér ánægju að gera eitthvað í málunum - ekki bara hugsa um hvað er að og tala um það og segja einhverjum öðrum hvað þeir eigi að gera. Ég var fyrir utan nektardansstaðinn Goldfinger á laugardagskvöldið með ofbeldisvarnarhópi Femínistafélagsins að selja merki til að vekja neytendur kynlífsiðnaðarins til umhugsunar um athæfi sitt. Sjá
myndir á vefsíðu og
talskeyti af vettvangi. Tilgangurinn var líka að hafa áhrif á fjölmiðla þannig að kastljósið væri ekki alltaf á stúlkurnar í súludansinum þegar fjallað er í fjölmiðlum um slíka staði - heldur að færa kastljósið að viðskiptavinunum - að þeim sem kaupa kynlífsþjónustu. Þetta kvöld rann upp fyrir mér hversu brjóstumkennanlegir sumir viðskiptavinir slíkra staða eru, viðskiptavinir sem halda að það sé hægt að kaupa eilífa æsku og ást og hamingju með því að mergsjúga aðrar manneskjur og kaupa af þeim blíðu í litlum skömmtum. Það hæfir betur að nota orð eins og "aumingjastimpill" um slíka viðskiptavini en að nota það orð um femínista.